ಗಂಗಾವತಿ  20: ಜೀವಮಾನವೀಡೀ ಒಬ್ಬರನ್ನೊಬ್ಬರು ಅಗಲಿ ಇರಲಾರದಷ್ಟು ಅನ್ಯೋನ್ಯವಾಗಿದ್ದ ವೃದ್ಧ ದಂಪತಿಯೊಬ್ಬರು, ಸಾವಿನಲ್ಲೂ ಒಂದಾಗುವ ಮೂಲಕ ನಾಡಿಗೆ ಅಪರೂಪದ ಪ್ರೀತಿಯ ಸಂದೇಶ ಸಾರಿ ಹೊರಟುಹೋಗಿದ್ದಾರೆ. ತಾಲೂಕಿನ ಹೊಸಕೇರಾ ಗ್ರಾಮದಲ್ಲಿ ಈ ಹೃದಯವಿದ್ರಾವಕ ಘಟನೆ ಸಂಭವಿಸಿದ್ದು, ಪತ್ನಿ ಮೃತಪಟ್ಟ ಕೇವಲ ಒಂದೇ ವಾರದಲ್ಲಿ ಪತಿಯೂ  ಕೊನೆಯುಸಿರೆಳೆದಿದ್ದಾರೆ. ಗ್ರಾಮದ ಹಿರಿಯ ಜೀವಿಗಳಾದ ಮಲ್ಲಮ್ಮ ಶೇಖರ​‍್ಪ ಮುದೇನೂರು (80) ಅವರು ಕಳೆದ ಭಾನುವಾರದಂದು ವಯೋಸಹಜ ಕಾಯಿಲೆಯಿಂದ ನಿಧನರಾಗಿದ್ದರು. ಪತ್ನಿಯ ಅಗಲಿಕೆಯಿಂದ ತೀವ್ರವಾಗಿ ನೊಂದಿದ್ದ ಪತಿ ಶೇಖರ​‍್ಪ ಮುದೇನೂರು (85) ಅವರು, ಕಳೆದೆರಡು ದಿನಗಳ ಹಿಂದಷ್ಟೇ ಪತ್ನಿಯ ಶ್ರದ್ಧಾಂಜಲಿ ಹಾಗೂ ಅಂತ್ಯಕ್ರಿಯೆಯ ಕಾರ್ಯಗಳನ್ನು ಮುಗಿಸಿದ್ದರು.

ಪತ್ನಿಯ ಅಗಲಿಕೆಯ ದುಃಖವನ್ನು ತಾಳಲಾರದ ಅವರು, ಈ ಭಾನುವಾರ ತೀವ್ರ ಹೃದಯಾಘಾತದಿಂದ ಕೊನೆಯುಸಿರೆಳೆದಿದ್ದಾರೆ. ಸಂಪೂರ್ಣ ಆರೋಗ್ಯವಂತರಾಗಿದ್ದ ಶೇಖರ​‍್ಪ ಅವರು ಪತ್ನಿಯ ಅಗಲಿಕೆಯ ಶೋಕದಿಂದಲೇ ತೀರಿಕೊಂಡಿದ್ದಾರೆ ಎಂದು ಕುಟುಂಬಸ್ಥರು ದುಃಖತಪ್ತರಾಗಿ ತಿಳಿಸಿದ್ದಾರೆ. ಒಂದೇ ವಾರದ ಅಂತರದಲ್ಲಿ ಮನೆಯ ಇಬ್ಬರು ಹಿರಿಯ ಜೀವಿಗಳನ್ನು ಕಳೆದುಕೊಂಡ ಕುಟುಂಬದ ಆಕ್ರಂದನ ಮುಗಿಲುಮುಟ್ಟಿದೆ. ಮೃತ ದಂಪತಿಯ ಅಂತ್ಯಕ್ರಿಯೆಯನ್ನು ವೀರಶೈವ ಲಿಂಗಾಯತ ಸಂಪ್ರದಾಯದಂತೆ ಹೊಸಕೇರಾ ಗ್ರಾಮದ ರುದ್ರಭೂಮಿಯಲ್ಲಿ ನೆರವೇರಿಸಲಾಯಿತು. ಪತ್ನಿ ಮಲ್ಲಮ್ಮ ಅವರ ಸಮಾಧಿಯ ಪಕ್ಕದಲ್ಲೇ ಪತಿ ಶೇಖರ​‍್ಪ ಅವರ ಸಮಾಧಿಯನ್ನೂ ಮಾಡಿ, ಅಂತಿಮ ಸಂಸ್ಕಾರ ಪೂರೈಸಲಾಯಿತು. ಸಾವಿನಲ್ಲೂ ಒಂದಾದ ಈ ದಂಪತಿಯ ಅಗಲಿಕೆಗೆ ಇಡೀ ಗ್ರಾಮವೇ ಕಣ್ಣೀರಿಟ್ಟಿದ್ದು, ಅವರ ಪವಿತ್ರ ಪ್ರೀತಿಯನ್ನು ಸ್ಮರಿಸಿದೆ.